Mötuneyti skólans sér nemendum og starfsmönnum fyrir mat í hádeginu gegn greiðslu.
Æskilegt er að allir nemendur komi með hollt og gott morgunnesti að heiman og áhersla er lögð á að nemendur í 1.-7. bekk komi umbúðalaust nesti.
Áður en kennsla hefst að morgni eiga allir nemendur kost á heitum hafragraut og mjólk í matsal skólans og er hann framreiddur frá klukkan 8:00 til 8:25.
Nemendum í 8 -10. bekkjum býðst einnig hafragrautur í löngu frímínútum klukkan 9:50–10:10.
Grauturinn er í boði skólans.
Um hádegisbil er gert hlé á kennslu nemenda og allir nemendur skólans eiga þess kost aðkaupa heitan mat í skólanum gegn fastri áskrift. Áskriftin gildir frá hausti en óski foreldrareftir að börn þeirra hætti í mat þarf tilkynning þar um að berast með mánaðar fyrirvara til skrifstofustjóra skólans. Matseðillinn er gefinn út mánaðarlega og birtist á heimasíðu skólans.

Söngleikir á yngsta- og miðstigi

Undanfarin ár hefur Hlíðaskóli þróað og unnið eftir hugmyndum um samþættingu listgreina. Í yngri deildum hefur samþættingin einkum falist í uppsetningu á árlegum söngleikjum þar sem
ýmsar listgreinar fléttast inn í tónmennt. Æft er í tónmenntatímum, bæði í bekkjarstofu og á samkomusal skólans. Söngleikir byggjast á samvinnu tónmenntakennara og bekkjarkennara.
Fyrirkomulag söngleikja í 1. – 7. bekk:
Á haustönn ár hvert eru settir upp söngleikir í 2. – 7. bekk undir stjórn tónmenntakennara. Nemendur í 1. bekk bíða hins vegar fram til vorannar með sína söngleiki. Í söngleikjum er unnið með söng, hljóðfæraleik, leiklist, sviðsmynd, dans og búninga. Foreldrum
og systkinum viðkomandi nemenda er boðið að koma á bekkjarskemmtanirnar sem segja má að séu eins konar uppskeruhátíðir. Foreldrar koma með kræsingar á sameiginlegt hlaðborð svo úr verður veisla fyrir öll skilningarvitin.
Verkefni:
Söngleikur í 1. bekk: Rauðhetta.
Söngleikur í 2. bekk: Dimmalimm.
Söngleikur í 3. bekk: Öskubuska.
Söngleikur í 4. bekk: Mjallhvít og dvergarnir ( tala dverganna er mjög breytileg og fer eftir fjölda nemenda í viðkomandi bekkjardeild hverju sinni).
Söngleikur í 5. bekk: Kardimommubærinn.
Söngleikur í 6. bekk: Gosi og félagar.
Söngleikur í 7. bekk: Úr fortíð til framtíðar.
Í gegnum vinnu við söngleik fá nemendur margvíslega þjálfun s.s. í söng og raddbeitingu, hljóðfæraleik, hreyfingu, hlustun, sköpun, munnlegri túlkun og sviðsframkomu.
Söngleikir byggjast mikið á samvinnu nemenda. Þar þurfa þeir að taka tillit hver til annars og sýna þolinmæði og umburðarlyndi. Í söngleik hafa allir mikilvægt hlutverk, allir eru þátttakendur og hlekkir í mikilvægu ferli.

Aðventuhátíð
Á aðventunni er efnt til sannkallaðrar aðventugleði í skólanum. Nemendur skreyta stofur sínar að morgni dags með bekkjakennara sínum og sérstök áhersla er lögð á að skreyta hurðir fallega enda von á gestum! Eftir löngu frímínútur er veisla í bekkjarstofunum þar sem boðið er upp á heitt súkkulaði með rjóma og dýrindis smákökur. Þessu næst er opið hús hjá öllum
bekkjardeildum, nemendur skiptast á heimsóknum, kynnast nýju fólki og í mörgum
kennslustofum er boðið upp léttar þrautir, glens og grín. Eftir hádegismat hefst hefðbundin kennsla.

Árshátíð unglingadeildar
Á hverjum vetri er haldin árshátíð unglingadeildar í samvinnu við Gleðibankann. Dagurinn hefst á íþróttamóti í þriðju kennslustund til hádegis en eftir það fara nemendur heim og undirbúa sig fyrir kvöldið.
Árshátíðin stendur yfir frá kl. 18.30 – 23.00.

Dagur eineltis
Nemendur í öllum árgöngum vinna verkefni sem tengjast baráttu gegn einelti.

Dagur íslenskrar tungu
Degi íslenskrar tungu er fagnað 16. nóvember eða nálægt þeim degi ef hann lendir á helgi. Í öllum árgöngum er verkefnavinna sem tengist íslenskri tungu.

Dagur íslenska táknmálsins
Táknmálsdagurinn er haldinn í kringum 11. febrúar. Markmiðið með deginum er að efla táknmálið og táknmálsumhverfið.

Hundraðdagahátíð í 1. bekk
Fyrsta daginn í 1. bekk er hafist handa við að telja rör fyrir hvern dag sem börning eru í skólanum. Þegar rörin eru orðin hundrað er haldin hátíð þar sem unnið er með töluna 100.

"Skipulagsdagur" að hausti með nemendum
Fyrsta skóladag nemenda er skipulagsdagur með nemendum. Umsjónarkennari, með aðstoðarkennara, er með hópinn sinn allan daginn. Skólabragurinn er mótaður á þessum degi.
Verkefni dagsins getur verið að:að útbúa bekkjarreglur

• fara yfir námstækni
• fara yfir reglur á göngum
• fara yfir reglur í fatahengi
• fara yfir reglur í matsal
• þjálfa það að ganga í röð
• þjálfa yndislestur, fá bækur, umgengni um bækur, hvernig er lestrarstund.
• rifja upp vinabekki, vinna verkefni með vinabekkjum

Nemendur í 1. – 4. bekk sem búa í Suðurhlíðum eiga kost á akstri til og frá skóla. Skólabíllinn
er á ferðinni um klukkan 8:00 að morgni.

Sundkennsla fer fram í Sundhöll Reykjavíkur og Laugardalslaug. Nemendum er séð fyrir akstri báðar leiðir.