Tekið er mið af niðurstöðum skimunarprófa s.s. Lesferils, Logos og Talnalykils, auk prófa og kannana umsjónarkennara (sjá skimunaráætlun Hlíðaskóla) þegar ákvörðun er tekin um stoðkennslu fyrir nemendur.
Nemendum í 1. bekk fylgja oft niðurstöður úr Hljóm sem lagt er fyrir í leikskóla. Hljóm er próf sem athugar hljóð- og málvitund leikskólabarna og gefur vísbendingar um hugsanlega námserfiðleika. Talmeinafræðingar skima alla nemendur 1. bekkjar (sjá skimunaráætlun).
Umsjónarkennarar sækja um stoðkennslu fyrir nemendur í samráði við foreldra til deildarstjóra stoðkennslu. Í umsókninni kemur fram hver staða nemandans er í námi, hvaða námsþætti nemandinn þarf stuðning við og hvernig komið hefur verið til móts við námsþarfir hans í bekknum. Þar kemur fram hvaða kannanir, próf og/eða greiningar liggja að baki umsókninni.
Foreldrar / forráðamenn geta óskað eftir stoðkennslu og fer þá beiðnin til deildarstjóra stoðkennslu sem metur þörfina.
Flestir nemendur sem fá stoðkennslu fylgja bekkjarnámskrá, en einstaklingsnámskrá er gerð fyrir nemendur þegar víkja þarf frá markmiðum og leiðum bekkjarins.
Helstu námsþættir sem nemendur þurfa stoðkennslu í eru lestur, ritun og stærðfræði.

Nemendur sem glíma við lestrarerfiðleika geta þurft þjálfun í hljóðgreiningu, þjálfun til að auka lestrarhraða og lestraröryggi, efla lesskilning og leikni í vinnu með texta. Lögð er áhersla á notkun hljóðbóka, leiðréttingaforrita og námstækni.
Kennsla í ritun eða vinnu með mál getur falist í skriftarþjálfun, þjálfun í einstökum þáttum hljóðgreiningar, að nýta sér reglur í stafsetningu, þjálfun í málfræði, vinnu með málfræðihugtök og ritun ýmiss konar texta.
Nemendur sem eiga í erfiðleikum í stærðfræði geta þurft hlutbundna kennslu, þjálfun grunnaðgerða, hægari yfirferð eða annað námsefni.
Kennsla í námsveri fer að mestu fram í námskeiðsformi. Gengið er út frá því að unnið sé með sama efni í bekk á sama tíma og stoðkennsla fer fram í námsveri, en efnistök geta verið ólík.
Fyrir hvert námskeið eru sett skilgreind markmið, leiðir og námsefni ákveðið. Fjöldi kennslustunda á viku og hve lengi námskeiðið á að standa er ákveðið í upphafi. Þessar upplýsingar eru kynntar nemendum í fyrsta tíma námskeiðs. Í lok námskeiðs er árangur metinn.
Sérkennarar í námsveri sinna nemendum sem þurfa tímabundið eða til lengri tíma aðra nálgun í námi en unnið er eftir í bekknum.
Sérkennarar í námsveri veita samkennurum stuðning og ráðgjöf um námsefni og leiðir í kennslu nemenda með námsörðugleika.

Þjónusta við þennan nemendahóp er breytileg. Hver nemandi er einstakur, með sín sérkenni og þarfir, sem kennslutilhögun skólans verður að taka mið af.
Markmiðið er að einstaklingsþörfum nemenda sé sem mest mætt á vinnusvæði bekkjarins og í almennri þátttöku í skólastarfinu. Ef þörf er á óskar umsjónarkennari og/eða foreldrar eftir stuðningi/stoðkennslu fyrir nemanda hjá deildarstjóra stoðkennslu.
Markmiðið með félagslegum stuðning er að stuðla að bættri félagsfærni og aukinni félagslegri þátttöku. Umsjónarkennari og starfsmenn stoðþjónustu vinna saman að félagslegum stuðningi. Félagslegur stuðningur nemenda getur falist í:

• skipulegri samvinnu nemenda í litlum hóp
• skipulagðri vinnu með virkni nemenda í frímínútum og frjálsum leik
• vinnu með Cat kassann
• vinnu með félagsfærnisögur
• vinahópum
• vinaliðum
• fræðslu um einelti

Ef ástæða þykir er teymi stofnað í kringum nemandann þar sem unnið er að sameiginlegum markmiðum er varða skólagöngu hans. Teymið er skipað foreldrum, umsjónarkennara og öðrum starfsmönnum skólans sem mest vinna með nemandanum. Í teyminu geta einnig verið aðilar utan skólans sem koma að málefnum nemandans. Tilgangur þverfaglegra teyma er að samhæfa þjónustu. Teymin funda a.m.k. tvisvar á ári og oftar ef þörf er á.

Einstaklingsnámskráin hefur skýra tengingu við bekkjarnámskrána og þar eru námsáherslur, námsefni og kennsluaðferðir aðlagaðar að þörfum nemandans. Markmið einstaklingsnámskrár eru reglulega metin og endurskoðuð.

Námsráðgjafi er talsmaður nemenda og trúnaðarmaður. Hlutverk námsráðgjafans er að standa vörð um velferð allra nemenda. Með hliðsjón af starfslýsingu fyrir námsráðgjafa í grunnskólum Reykjavíkur eru helstu viðfangsefni þessi:

• Að aðstoða nemendur í 8. – 10. bekk við val á námsgreinum
• Að annast náms- og starfsfræðslu
• Að veita ráðgjöf vegna náms- og starfsvals
• Að aðstoða og leiðbeina nýjum nemendum
• Að fylgja nemendum eftir inn í framhaldsskóla
• Að vinna að bættum samskiptum innan skólans
• Að sinna fyrirbyggjandi starfi í samstarfi við foreldra, starfsmenn skólans og sérfræðiþjónustu Þjónustumiðstöðvar Vesturbæjar, Miðborgar og Hlíða.

Tilgangur skólaheilsugæslu er að fylgjast með heilsu, þroska, líðan og högum barna á grunnskólaaldri. Hlutverk hennar er að stuðla að líkamlegu, andlegu og félagslegu heilbrigði skólabarna og að greina og sinna heilbrigðisvandamálum sem hafa áhrif á velferð nemenda og námsgetu. Einnig að meta þá þætti í umhverfi og aðstæðum barna sem hafa áhrif á heilsu og líðan þeirra. Boðið er upp á reglulegar skoðanir, viðtöl og fræðslu. Til þess að þetta sé mögulegt þarf að koma til samstarf allra í skólasamfélaginu, þ.e. nemenda, starfsfólks, foreldra og heilsugæslu og eftir þörfum aðila utan skólans.

Heilsugæsla Hlíðaskóla er á vegum heilsugæslunnar í Hlíðahverfi. Hjúkrunarfræðingur skólans, er með fasta viðveru í skólanum alla virka daga. Mikilvægt er að starfsfólk skólans fái upplýsingar um þá nemendur sem þurfa á sérstöku eftirliti og umhyggju að halda. Má þar nefna langvinna sjúkdóma, ofnæmi, lyfjanotkun eða breytingar á högum nemenda. Farið er með allar upplýsingar sem trúnaðarmál. Hér á eftir fara helstu verkefni heilsugæslunnar:

• 1. bekkur. Hjúkrunarskoðun, sjónpróf og heyrnarmæling. Bólusett gegn
  barnaveiki og stífkrampa.
• 2. bekkur. Hjúkrunarskoðun og sjónpróf.
• 3. bekkur. Hjúkrunarskoðun og berklapróf.
• 4. bekkur. Hjúkrunarskoðun og sjónpróf. Bólusett gegn mænusótt.
• 7. bekkur. Hjúkrunarskoðun og sjónpróf. Mótefni gegn rauðum hundum mæld hjá stúlkum og þeim sem engin mótefni hafa er boðin bólusetning. Einnig er boðið upp á bólusetningu gegn hettusótt.
• 9. bekkur. Hjúkrunarskoðun, sjónpróf og heyrnarmæling. Boðið viðtal við lækni.

Hjúkrunarfræðingur sér einnig um að fræða nemendur um svefn, hreinlæti og næringu